Tuğçe Bulutun həmtəsisçisi olduğu şirkət 8,4 milyon dollar investisiya alıb

Tuğçe Bulut həmtəsisçisi olduğu “Eloquent AI” şirkəti ilkin investisiya turunu 8,4 milyon dollar məbləğində başa çatdırıb. “Foundation Capital”ın rəhbərlik etdiyi investisiya turunda “Revo Capital” da iştirak edib.

Valyuta.az xəbər verir ki, investisiya “Revo Capital”ın 2025-ci ildə yaratdığı 100 milyon dollarlıq “Fund III” fondu vasitəsilə həyata keçirilib.

ABŞ mərkəzli “Eloquent AI” bildirib ki, cəlb olunan vəsait maliyyə qurumları üçün nəzərdə tutulan Süni İntellekt Operator platformasının genişləndirilməsinə və Avropa da daxil olmaqla qlobal bazarda yayılmasına yönəldiləcək. Şirkət 2025-ci ildə Tuğçe Bulut və maşın öyrənməsi üzrə professor doktor Aldo Lipani tərəfindən təsis edilib.

Şirkətin əsas məhsulu banklar, fintech şirkətləri və sığorta qurumları kimi yüksək tənzimlənən sahələr üçün hazırlanıb. Bu məhsul mürəkkəb əməliyyat iş axınlarını avtomatlaşdırmağa imkan verən Süni İntellekt Operatorundan ibarətdir. Bu iş axınlarına müştəri qeydiyyatı (onboarding) yoxlamaları, mübahisə və chargeback əməliyyatları, sanksiyaların yoxlanması və uyğunluq prosesləri daxildir. Platforma tənzimlənən maliyyə iş axınları üzrə təlim keçmiş çoxmodlu böyük dil modelindən istifadə edir.

Mayya Hüseynova