Tullantı materiallarından istifadə edərək yaradılan moda brendi - SƏHƏR OXUSU

Təbii resursların həddindən artıq istifadəsi və sənaye tullantılarının artması son illərdə qlobal miqyasda ciddi problemlərdən birinə çevrilib. Bəzi şirkətlər, brendlər yanlız sərvət qazanmaq yox, bu kimi problemlərin həllinə də çalışır.

Valyuta.az xəbər verir ki, məhz bu problemlərin fonunda yaranan "ECOALF" brendi tullantılara fərqli yanaşma gətirərək onları dəyərə çevirən biznes modeli qurub.

Valyuta.az xəbər verir ki, İspaniyada 2009-cu ildə təsis edilən "ECOALF"ın əsas məqsədi bazarda mövcud ən keyfiyyətli məhsullarla eyni səviyyədə, lakin tam təkrar materiallardan hazırlanan geyimlər istehsal etmək olub. Şirkət bununla sübut etməyə çalışır ki, müasir tələbatları qarşılamaq üçün təbii resurslardan həddindən artıq istifadə etmək mütləq deyil və alternativ yollar mövcuddur.

Şirkətin biznesinin təxminən yarısı İspaniyadan kənarda formalaşır və əsas bazarları Avropa ilə ABŞ-dır. Brend həm onlayn satış kanalları, həm də müxtəlif ölkələrdə yerləşən mağazalar vasitəsilə fəaliyyətini genişləndirib.

"ECOALF"ın fərqləndirici xüsusiyyətlərindən biri də innovasiya və araşdırmaya verdiyi önəmdir. Şirkət plastik butulkalar, balıq torları, köhnə şinlər, qəhvə qalıqları və tekstil tullantıları kimi materiallardan istifadə edərək 300-dən çox yeni parça növü hazırlayıb. Bu materiallar daha sonra geyim, ayaqqabı və müxtəlif aksesuarlara çevrilir.

Brendin fəaliyyəti yalnız bizneslə məhdudlaşmır, eyni zamanda ətraf mühitə təsiri ilə də diqqət çəkir. Təkcə 2019-cu ilin qış kolleksiyası çərçivəsində 200 milyondan çox plastik butulka təkrar emal edilib və 38 milyon litrdən artıq suya qənaət olunub.

"ECOALF" 2015-ci ildə başladığı “Upcycling the Oceans” layihəsi ilə isə okeanların təmizlənməsinə töhfə verir. Layihə çərçivəsində minlərlə balıqçı prosesə cəlb olunub, onlarla limanda fəaliyyət genişləndirilib və yüzlərlə ton tullantı dənizdən çıxarılıb. Toplanan bu materiallar yenidən emal olunaraq yüksək keyfiyyətli məhsullara çevrilir.

Şirkətin “There is no Planet B” - yəni “Başqa planet yoxdur” şüarı isə artıq qlobal çağırışa çevrilərək minlərlə insanı ətraf mühitin qorunmasına dəstək verməyə təşviq edir.