“Vectorial AI” startapı 40 min dollar investisiya alıb

Mərkəzi Avrasiyadan olan investorlar icması “Silkroad Angels” ABŞ-ın B2B süni intellekt startapı “Vectorial AI”a 40 min dollar investisiya etdiyini açıqlayıb.

Valyuta.az xəbər verir ki, “Vectorial AI” məhsul, dizayn və marketinq materiallarını virtual istifadəçilər vasitəsilə test etməyə imkan verən platforma hazırlayır.

Şirkətin “SAPIENS” adlı süni intellekt agentləri real davranış məlumatları əsasında öyrədilib.

Şirkətin məlumatına görə, “Sapiens 1.0” modeli istifadəçi reaksiyalarını proqnozlaşdırmaqda 84 faiz dəqiqlik göstərir. Bildirilir ki, bu proses ənənəvi istifadəçi araşdırmaları ilə müqayisədə həm daha sürətli, həm də daha ucuzdur.

Startapın investorları arasında “Berkeley SkyDeck” akseleratoru da yer alır. Layihənin akademik tərəfdaşları isə Stenford Universiteti və Karnegi Mellon Universitetinin tədqiqat laboratoriyalarıdır.

“Silkroad Angels”in həmtəsisçisi Abay Absamet bildirib ki, “Vectorial AI” istifadəçi araşdırmalarını real davranış simulyasiyası ilə əvəz edərək şirkətlərə daha sürətli qərarvermə imkanı yaradır.

Mayya Hüseynova