Xaricə səyahət zamanı ultra varlıların həmişə aldığı 4 məhsul

Varlı insanlar gündəlik həyatlarında qənaətcil davrana bilsələr də, xaricə səyahət zamanı alış-veriş mövzusunda bəzən maliyyə ehtiyatını kənara qoyurlar.

2026-cı ilin yanvar ayında "MyCross" tərəfindən yayımlanan hesabatda ultra varlı şəxslərin xaricə səfərləri zamanı hansı məhsulları aldıqları və bu alışlara nə qədər vəsait xərclədikləri təhlil olunub.

Eksklüziv qastronomik məhsullar

Populyar alış şəhərləri: Mərakeş, Hindistan və İtaliya
Qiymət aralığı: 50–1000 dollar
Ən çox alınan məhsullar: zəfəran, ağ trüfel, qara "Périgord" trüfeli, Himalay çəhrayı duzu

Xarici ölkəyə səyahət edənlərin bildiyi kimi, bu təcrübənin əsas hissələrindən biri mətbəxdir. Yerli dadlar səfəri daha yadda qalan edir. Bu səbəbdən varlı səyahətçilər tez-tez öz ölkələrində tapılması çətin olan nadir ədviyyatlar və qastronomik məhsullar alırlar.

Sifarişlə hazırlanan zinət əşyaları

Populyar alış şəhəri: Dubay
Qiymət aralığı: 5 000–50 000 dollar
Ən çox alınan məhsullar: iri ölçülü sırğalar və üzüklər, yüksək əyarlı qızıl və brilyant məmulatları

Sifarişlə hazırlanan zinət əşyalarını onlayn əldə etmək mümkün olsa da, burada söhbət fərdi ustalardan deyil, unikal və yüksək səviyyəli məhsullar təqdim edən zərgərlərdən gedir. Ultra varlılar bu cür eksklüziv zinət əşyaları üçün Dubayı, o cümlədən "Messika" kimi müasir zərgərlik evlərini və "Gold Souk" bazarını seçirlər.

Məhdud buraxılışlı çantalar

Populyar alış şəhərləri: Paris, Milan və Tokio
Qiymət aralığı: 1 500 dollardan 150 000 dollardan yuxarı
Ən çox alınan məhsullar: "Hermès Birkin", "Gucci Dionysus", "Prada Galleria", "Louis Vuitton Keepall"

Parisə səfər edən ultra varlılar çox vaxt Eyfel qülləsi kimi turistik məkanlardan daha çox alış-verişə üstünlük verirlər. Onlar xüsusilə "Hermès Birkin" kimi məşhur çantalara böyük məbləğlər xərcləyirlər. Milan "Gucci" və "Prada", Tokio isə yalnız Yaponiyaya məxsus "Louis Vuitton" kolleksiyaları üçün seçilir.

Premium saatlar

Populyar alış şəhərləri: Cenevrə və Sürix
Qiymət aralığı: 5 000 dollardan bir neçə milyon dollara qədər
Ən çox alınan məhsullar: "Rolex Submariner", "Patek Philippe Nautilus", "Audemars Piguet Royal Oak Offshore"

Premium saatlar yüksək statusun göstəricisi hesab olunur. Varlı səyahətçilər tez-tez bu saatları istehsal olunduğu Avropa şəhərlərində almağa üstünlük verirlər. Cenevrə "Rolex" və "Patek Philippe", Sürix isə "Audemars Piguet" və "IWC" kimi brendlər üçün əsas mərkəzlərdəndir.

Tənzilə Ağabalayeva