Yaxın Şərqdə münaqişə başlayandan Aİ-nin yanacaq xərcləri 22 milyard avro artıb

Avropa İttifaqının enerji resursları idxalına çəkdiyi xərclər Yaxın Şərqdə davam edən münaqişənin başlanmasından sonra 44 gün ərzində 22 milyard avro artıb. 

Valyuta.az xəbər verir ki, bu barədə Avropa Komissiyasının sədri Ursula fon der Lyayen Brüsseldə keçirilən mətbuat konfransında məlumat verib.

O bildirib ki, Hörmüz boğazında davam edən blokada ciddi ziyana səbəb olur. "Azad gəmiçiliyin bərpası bizim üçün prioritet əhəmiyyət daşıyır”, deyə Avropa Komissiyasının rəhbəri "Reuters" agentliyinə istinadən qeyd edib. Onun sözlərinə görə, xərclər artsa da, idxalın fiziki həcmi bir molekul belə artmayıb.

Ursula fon der Lyayen həmçinin bildirib ki, Avropa Komissiyası gələn həftə Yaxın Şərqdəki vəziyyətlə bağlı fövqəladə tədbirlər təklif edəcək. Bu tədbirlər arasında qiymətlərin azaldılması məqsədilə neft ehtiyatlarından istifadə də nəzərdən keçirilir.

Hörmüz boğazı ilə neft və maye təbii qaz daşımalarında yaranan çətinliklər ABŞ və Avropada yanacaq qiymətlərinin kəskin artmasına səbəb olub. 12 apreldə ABŞ prezidenti Donald Tramp İranla aparılan uğursuz danışıqlardan sonra Amerika qüvvələrinin Hörmüz boğazını blokadaya alacağını elan edib. Bildirilib ki, blokada 13 aprel saat 17:00-dan etibarən qüvvəyə minəcək. Xəbərdən sonra Brent markalı neftin fyuçersləri 6 dollardan çox bahalaşaraq 7 faizdən artıq artım göstərib və bir barel üçün 101 dolları ötüb.

Paşa Məmmədli