Yeni rəhbərin gəlişindən sonra “Azersun Holding”də iki xarici yüksək vəzifəli şəxs istefa verdi

Norbert Klein və Gökhan Uğurlu “Azersun Holding”də tutduqları vəzifələrdən ayrılıblar.

Valyuta.az xəbər verir ki, hər iki əməkdaş bununla bağlı “LinkedIn” sosial şəbəkəsində paylaşım edib.

Norbert Klein bildirib ki, keçən həftə “Azersun Holding”də FMCG üzrə İdarəedici Direktor və İdarə Heyətinin sədrinin müşaviri vəzifələrindən istefa verib:

"Bu qərar İdarə Heyətinin sədri Əhməd Gözəlin (Ahmad Gozal) istefasından sonra qəbul olundu. Bakıda peşəkar və güclü komanda ilə birlikdə çalışmaq mənim üçün maraqlı və dəyərli təcrübə oldu. Mənə göstərdiyiniz etimada və bu tanınmış şirkətin inkişafına verdiyiniz töhfələrə görə hər birinizə təşəkkür edirəm".

Qeyd edək ki, Norbert Klein “Azersun Holding”də 2025-ci ilin oktyabr ayından etibarən İdarə Heyətinin sədrinin müşaviri vəzifəsində çalışıb. Həmçinin 2026-cı ilin yanvar ayından aprel ayınadək FMCG üzrə İdarəedici Direktor və sədrin müşaviri vəzifəsini də icra edib.

Gökhan Uğurlu isə paylaşımında qeyd edib ki, gərgin və eyni zamanda məhsuldar bir fəaliyyət dövründən sonra “Azersun Holding”də İdarə Heyəti sədrinin müşaviri və aparat rəhbəri vəzifələrindən ayrılmaq qərarına gəlib:

"2024-cü ildən etibarən daha korporativ, strukturlaşdırılmış və nəticəyönümlü idarəetmə modelinə keçid prosesinə töhfə vermək mənim üçün böyük şərəf oldu. “Azersun”un peşəkar rəhbər heyəti ilə birlikdə idarəetmə mexanizmlərini gücləndirdik, vəzifə bölgüsünü daha aydın şəkildə formalaşdırdıq və təşkilat daxilində liderliyi daha da inkişaf etdirdik. Rəhbərlikdə baş verən son dəyişiklikləri nəzərə alaraq, əvvəlki İdarə Heyətinin sədri ilə sıx bağlı olan rolum çərçivəsində bu mərhələdə vəzifədən ayrılmağı düzgün hesab etdim. Mənə göstərdiyi etimada, dəstəyə və nümunəvi liderliyinə görə İdarə Heyətinin sədri Əhməd Gözələ (Ahmad Gozal) səmimi təşəkkürümü bildirirəm".

Məlumat üçün qeyd edək ki, G.Uğurlu 2024-cü ilin avqust ayından 2026-cı ilin aprel ayınadək qeyd olunan vəzifələrdə çalışıb.