Bayram günündə işləyən işçiyə ikiqat ödəniş əvəzinə istirahət vermək olar?

Bəzi iş yerlərində, xüsusilə xidmət və satış sahəsində çalışan işçilər bayram və istirahət günlərində də işləmək məcburiyyətində qalırlar. Bu zaman bəzi yerlərdə işçilərə əlavə ödəniş etmək əvəzinə, sonradan istirahət günü verilir. Hətta bəzi hallarda bu seçim kimi yox, məcburi qayda kimi tətbiq olunur. İşçilər isə əlavə işlədikləri günlərin qarşılığını pul şəklində almaq istədiklərini bildirirlər. Maraqlıdır, əlavə işə görə mütləq ödəniş edilməlidir, yoxsa məzuniyyətlə əvəz etmək mümkündür?

İnsan Resursları üzrə mütəxəssis Asim Həsənov Valyuta.az-a bildirir ki, Əmək Məcəlləsinə əsasən bəzi sahələrdə - fasiləsiz istehsalat, ticarət, ictimai iaşə, nəqliyyat və digər xidmət sahələrində işçilərin bayram günlərində işə cəlb olunmasına yol verilir, lakin bu, müəyyən qaydalar çərçivəsində həyata keçirilməlidir: "Qanunvericiliyə görə iş günü hesab edilməyən bayram günlərində görülən işə görə əməkhaqqı vaxtamuzd sistemdə gündəlik və ya saatlıq əməkhaqqının iki mislindən az olmayaraq, işəmuzd sistemdə isə ikiqat tariflə ödənilməlidir".

Ekspertin sözlərinə görə, işçinin istəyi olarsa, əlavə ödəniş əvəzinə ona başqa istirahət günü verilə bilər: "Burada əsas şərt işçinin razılığıdır. İşəgötürən bu seçimi məcburi şəkildə tətbiq edə bilməz. İş vaxtından artıq saatlarda görülən işlərə münasibətdə isə fərqli qayda tətbiq olunur. Bu halda əlavə işlənmiş saatlara görə mütləq pul ödənişi edilməlidir və bunu istirahət günü ilə əvəz etmək mümkün deyil".

A.Həsənov əlavə edir ki, 18 yaşına çatmamış şəxslərin bayram və istirahət günlərində işə cəlb edilməsi qadağandır: "Həmçinin hamilə qadınlar, 14 yaşınadək uşağı olan və ya əlilliyi olan uşağa baxan qadınlar yalnız öz yazılı razılığı ilə belə günlərdə işləyə bilərlər. Qanunvericiliyə görə, istirahət və bayram günlərində işə cəlb olunma yalnız müəyyən müstəsna hallarda mümkündür. Bunlara fövqəladə vəziyyətlərin aradan qaldırılması, kommunal xidmətlərin bərpası və digər zəruri hallar daxildir.

Sərvanə Rəmixanova