Ceymi Daymon öyrəndiyi ən dəyərli karyera sirrini açıqlayıb: “Mən hələ də bu səhvi edirəm”

“JPMorgan Chase”in baş icraçı direktoru Ceymi Daymonun son karyera tövsiyəsi sadədir: xüsusilə həftənin sonunda yorğun olduğunuz vaxt böyük qərarlar verməyin.

“Cümə günü yorğun halda böyük qərarlar vermək çox pis fikirdir”, — Daymon gənclik dövründə nəyi əvvəlcədən bilmək istədiyi barədə sualı cavablandırarkən “NPR”a müsahibəsində deyib.

Daymon emosional intizamın liderlik üçün vacib olduğunu da bildirib. Onun sözlərinə görə, liderin mühakiməsini poza biləcək emosiyalardan biri qəzəbdir.

Keçən ay 70 yaşı tamam olan Daymon iki onillikdən artıq müddətdir ABŞ-ın ən böyük bankı olan “JPMorgan”a rəhbərlik edir. O bildirib ki, bu dərsləri zaman keçdikcə “öyrənib və yenidən öyrənib”, lakin mükəmməl olmadığını da etiraf edib.

“Təəssüf ki, mən hələ də həmin səhvlərin bəzilərini edirəm”, — o deyib.

Qərar yorğunluğunun təhlükələri

Kembric Universitetində təşkilati sosiologiya və liderlik üzrə dərs deyən Tomas Rule bildirib ki, Daymon haqlıdır — “qərar yorğunluğu”, yəni məlumatı emal etmək qabiliyyətinin zəifləməsi təhlükəli ola bilər. Onun sözlərinə görə, həftə başa çatarkən baş direktorlar tez qərar vermək təzyiqi hiss edə bilər. Bu isə bütün faktlar məlum olmadan və ya lazımi şəxslərlə məsləhətləşmədən qərar qəbuluna səbəb ola bilər.

“Əgər baş direktor həftə ərzində fasilə vermədən ardıcıl qərarlar qəbul edibsə, düzgün qərar vermək üçün lazım olan idrak resursları cümə gününə qədər tükənmiş olur”, — Rule deyib.

O əlavə edib ki, bir çox rəhbər və ambisiyalı peşəkarların üzləşdiyi struktur problem də budur: həftənin sonunda komandaların irəliləməsi üçün “sadəcə qərar ver” təzyiqi yaranır. Halbuki məlumatlar natamam ola və ya əsas məsləhətçilərlə məsləhətləşmə aparılmaya bilər. Daymonun fikrincə, zəif, lakin ciddi nəticələr doğura biləcək qərar verməmək üçün bu tempə qarşı çıxmaq və qısa gecikməni qəbul etmək daha doğrudur.

Həyat məqsədiniz olsun

Daymon “NPR” müsahibəsində həyat məqsədinin “dünyanı daha yaxşı yerə çevirmək” olduğunu deyib. Onun sözlərinə görə, o, “hamıya yaxşı davranmaq”, “bacardığının ən yaxşısını etmək” kimi dəyərlərlə böyüdülüb və bu prinsiplər dəyişməyib.

Daymon hesab edir ki, insanı iş həyatının çətin və cazibəsiz dövrlərində ayaqda saxlayan keçici xoşbəxtlik deyil, məqsəd hissidir. O, bu ilin əvvəlində İsveçrənin Davos şəhərində keçirilən “Female Quotient” tədbirində gənc işçilərə xatırladıb ki, hər işin dözülməli çətin tərəfləri var və daimi həyəcan və ani məmnunluq axtarışı perspektivli karyeranı poza bilər.

“Yeni iş axtarmayın”, — Daymon tədbirdə bildirib. “Bəzi insanlar daim başqa şeylər düşünür və həyatlarını korlayırlar. Halbuki sadəcə gördükləri işdən zövq almalıdırlar.”

Daymon əlavə edib ki, uğurlu karyera qurmaq üçün zəhmətin alternativi yoxdur.

“Çox çalışın. Bunun əvəzi yoxdur”, — o deyib. “Hələ də elə insanlar görürəm ki, qəhrəmancasına hansısa uğura qısa yol tapacaqlarını düşünürlər. Bu, demək olar ki, heç vaxt doğru olmur.”

Tənzilə Ağabalayeva