“Marketinqdə nəticə vaxt aparır” demək kifayət etmir"

Hazırda şirkətlərin tanınması, satış strategiyasının gücləndirilməsi və kampaniyaların hazırlanması üçün sosial media səhifələrində paylaşımlara ehtiyac duyulur. Bu zaman rəhbərlər marketinq mütəxəssisləri ilə əməkdaşlığa başlayırlar. Lakin reklam paylaşılan kimi bəzi rəhbərlər ilk gündən nəticənin zəif olduğunu düşünərək narazılıq edirlər. Rəqəmsal marketinq mütəxəssisləri isə reklamın dərhal nəticə verməyəcəyini, səhifənin izləyici sayının bir gün ərzində sürətlə artmasının real olmadığını izah etdikdə tərəflər arasında mübahisə yaranır. Bəs sosial şəbəkədə edilən ilk paylaşımlardan yüksək nəticə gözləmək nə dərəcədə realdır?

Rəqəmsal marketoloq Aydan Salay Valyuta.az-a bildirir ki, SMM və rəqəmsal marketinqdə ilk gündən yüksək nəticə gözləmək, bir toxumun torpağa düşdüyü gün məhsul toplamağı gözləməyə bənzəyir: "Bu problem Azərbaycan iş dünyasında kifayət qədər geniş yayılıb. Düzdür, Azərbaycanda rəqəmsal marketinq sektoru inkişaf edir, lakin müştəri-mütəxəssis münasibətlərinin idarə edilməsi hələ də zəif nöqtədir. Bir çox rəhbər "reklam = dərhal satış" düşüncəsindən çıxa bilmir, bir çox mütəxəssis isə prosesi başlanğıcda düzgün çərçivəyə sala bilmir. Nəticədə gözlənti ilə reallıq arasında yaranan uçurum münaqişəyə çevrilir”.

Ekspert vurğulayır, bu, texniki anlayış deyil, gözlənti idarəetməsi problemidir. Münaqişənin kökündə iki tərəfin fərqli dildə danışması dayanır: "Rəhbər "reklam qoydum, nəticə gəlməlidir" düşüncəsindədir, mütəxəssis "proses qurulur, zamanla görünəcək" mövqeyindədir. Bu iki nöqtə heç vaxt üst-üstə düşməz. Əksər hallarda bu uçurum, işin başlanğıcında aydın KPI-ların, real müddətlərin və ölçülə bilən hədəflərin müzakirə edilməməsindən yaranır".

A.Salayın sözlərinə görə, rəqəmsal marketinqdə nəticə mərhələlidir: “Reklamın ilk həftəsi auditoriyanı tanıma mərhələsidir. Bu müddətdə platforma öyrənmə prosesində olur, məzmun isə alqoritm tərəfindən qiymətləndirilir. İzləyici sayının bir gecədə artması nə realdır, nə də saxlana bilən bir nəticədir. Satışa çevrilmə üçün isə çox vaxt auditoriya etibar qazanma dövrü, etibar formalaşması və çoxsaylı toxunma nöqtəsi lazımdır. Bunlar kənar amillərlə deyil, platformaların özünün iş məntiqi ilə bağlıdır”.

Rəqəmsal marketoloq qeyd etdi ki, mütəxəssis nəticələrin əldə olunma müddətini də əvvəldən rəhbərliyə izah etməlidir: “Mütəxəssis tərəfindən də bir vəzifə var: işin başlanğıcında nəyin nə vaxt gözlənilə biləcəyini konkret şəkildə izah etmək. "Nəticə vaxt aparır" demək kifayət etmir. Hansı müddətdə hansı göstərici izlənəcək, hansı rəqəm uğur sayılacaq - bunlar əvvəlcədən müzakirə edilməlidir. Şəffaf kommunikasiya olmadan hər iki tərəf haqlı mövqedə duraraq mübahisə edəcək.

İstənilən rəqəmsal marketinq əməkdaşlığı əvvəlcə "nəyi ölçəcəyik, nə vaxt nəyi gözləyəcəyik" sualına yazılı cavab verməklə başlamalıdır. Mütəxəssis bunu etməyi bacarmırsа, o, texniki biliyini işə çevirməyi bacaran peşəkar deyil. Rəhbər buna hazır deyilsə, o da düzgün tərəfdaşlıq qurmağa hazır deyil”.

Nuranə Mübariz